ਨਵੀਂ ਦਿੱਲੀ 07 ਜੁਲਾਈ 2026 – ਭਾਰਤੀ ਕ੍ਰਿਕਟ ਟੀਮ ਇਸ ਸਮੇਂ ਇੰਗਲੈਂਡ ਦੇ ਦੌਰੇ ‘ਤੇ ਹੈ। ਇਸੇ ਦੌਰਾਨ BCCI ਨੇ ਜ਼ਿੰਬਾਬਵੇ ਦੌਰੇ ਲਈ ਟੀਮ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਟੀਮ ‘ਚ ਸੰਜੂ ਸੈਮਸਨ ਨੂੰ ਜਗ੍ਹਾ ਨਹੀਂ ਮਿਲੀ ਹੈ। ਇੰਗਲੈਂਡ ਦੌਰੇ ‘ਤੇ ਦੂਜੇ ਟੀ-20 ਮੈਚ ‘ਚ ਉਨ੍ਹਾਂ ਨੂੰ ਪਲੇਇੰਗ-11 ‘ਚੋਂ ਬਾਹਰ ਕਰ ਦਿੱਤਾ ਗਿਆ ਸੀ ਅਤੇ ਹੁਣ ਟੀਮ ‘ਚੋਂ ਵੀ ਉਨ੍ਹਾਂ ਦਾ ਨਾਂ ਕੱਟ ਗਿਆ ਹੈ। ਇਹ ਸੰਜੂ ਲਈ ਖ਼ਤਰੇ ਦੀ ਘੰਟੀ ਹੈ। ਇਸ ਨਾਲ ਇਹ ਸਵਾਲ ਉੱਠਣ ਲੱਗੇ ਹਨ ਕਿ ਕੀ ਸੰਜੂ ਸੈਮਸਨ ਦਾ ਟੀਮ ਇੰਡੀਆ ਨਾਲ ਕਰੀਅਰ ਖ਼ਤਮ ਹੋ ਗਿਆ ਹੈ? ਸਵਾਲ ਜਾਇਜ਼ ਹਨ ਕਿਉਂਕਿ ਸੰਜੂ ਦੀ ਨਿਰੰਤਰਤਾ ਦੀ ਕਮੀ ਨੇ ਉਨ੍ਹਾਂ ਦਾ ਨੁਕਸਾਨ ਕੀਤਾ ਹੈ। ਟੀ-20 ਵਰਲਡ ਕੱਪ ‘ਚ ਉਹ ਸਫ਼ਲ ਰਹੇ, ਪਰ ਆਇਰਲੈਂਡ ਅਤੇ ਇੰਗਲੈਂਡ ਦੌਰੇ ‘ਤੇ ਉਸ ਫਾਰਮ ਨੂੰ ਬਰਕਰਾਰ ਨਹੀਂ ਰੱਖ ਸਕੇ ਅਤੇ ਇਸੇ ਕਾਰਨ ਉਨ੍ਹਾਂ ਨੂੰ ਪਲੇਇੰਗ-11 ‘ਚੋਂ ਬਾਹਰ ਕਰ ਦਿੱਤਾ ਗਿਆ।

ਕੀ ਹੈ ਅੰਦਰ ਦੀ ਗੱਲ?

ਜ਼ਿੰਬਾਬਵੇ ਖ਼ਿਲਾਫ਼ ਬੀਸੀਸੀਆਈ ਨੇ ਟੀਮ ਦਾ ਐਲਾਨ ਕਰਦੇ ਹੋਏ ਜੋ ਪ੍ਰੈਸ ਰਿਲੀਜ਼ ਜਾਰੀ ਕੀਤੀ ਹੈ, ਉਸ ‘ਚ ਸੰਜੂ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਗਈ। ਨਾ ਹੀ ਇਹ ਦੱਸਿਆ ਗਿਆ ਕਿ ਉਨ੍ਹਾਂ ਨੂੰ ਆਰਾਮ ਦਿੱਤਾ ਗਿਆ ਹੈ ਅਤੇ ਨਾ ਹੀ ਉਨ੍ਹਾਂ ਬਾਰੇ ਕੋਈ ਹੋਰ ਜਾਣਕਾਰੀ ਮੁਹੱਈਆ ਕਰਵਾਈ ਗਈ। ਸੰਜੂ ਭਾਰਤ ਲਈ ਸਿਰਫ਼ ਟੀ-20 ਕ੍ਰਿਕਟ ਹੀ ਖੇਡਦੇ ਹਨ। ਅਜਿਹੇ ‘ਚ ਇੱਕ ਫਾਰਮੈਟ ਖੇਡਣ ਵਾਲੇ ਖਿਡਾਰੀ ਨੂੰ ਆਰਾਮ ਦੇਣ ਦੀ ਗੱਲ ਜਾਇਜ਼ ਲੱਗਦੀ ਨਹੀਂ ਹੈ।

ਜ਼ਿੰਬਾਬਵੇ ਖ਼ਿਲਾਫ਼ ਅਕਸਰ ਭਾਰਤ ਆਪਣੀ ‘ਬੀ’ (B) ਟੀਮ ਉਤਾਰਦਾ ਹੈ ਅਤੇ ਉਨ੍ਹਾਂ ਖਿਡਾਰੀਆਂ ਨੂੰ ਮੌਕਾ ਦਿੰਦਾ ਹੈ ਜਿਨ੍ਹਾਂ ‘ਚ ਸਿਲੈਕਟਰ ਭਾਰਤ ਦਾ ਭਵਿੱਖ ਦੇਖ ਰਹੇ ਹੁੰਦੇ ਹਨ। ਇਸ ਸੀਰੀਜ਼ ‘ਚ ਕੁਝ ਅਜਿਹੇ ਖਿਡਾਰੀਆਂ ਨੂੰ ਮੌਕਾ ਵੀ ਮਿਲਿਆ ਹੈ, ਪਰ ਸੰਜੂ ਦੇ ਮਾਮਲੇ ‘ਚ ਇਹ ਗੱਲ ਫਿੱਟ ਬੈਠਦੀ ਨਹੀਂ ਦਿਖ ਰਹੀ। ਜਦੋਂ ਖਿਡਾਰੀ ਫਾਰਮ ‘ਚ ਨਹੀਂ ਹੁੰਦਾ, ਤਾਂ ਉਸ ਨੂੰ ਮੌਕੇ ਦਿੱਤੇ ਜਾਂਦੇ ਹਨ ਅਤੇ ਜ਼ਿੰਬਾਬਵੇ ਖ਼ਿਲਾਫ਼ ਸੰਜੂ ਨੂੰ ਮੌਕਾ ਦੇ ਕੇ ਉਨ੍ਹਾਂ ਦਾ ਖੋਇਆ ਹੋਇਆ ਆਤਮਵਿਸ਼ਵਾਸ ਵਾਪਸ ਲਿਆਂਦਾ ਜਾ ਸਕਦਾ ਸੀ, ਪਰ ਅਜਿਹਾ ਹੋਇਆ ਨਹੀਂ।

ਨਿਰੰਤਰਤਾ ਤੋਂ ਹਨ ਪਰੇਸ਼ਾਨ

ਸੰਜੂ ਦੀ ਸਭ ਤੋਂ ਵੱਡੀ ਸਮੱਸਿਆ ਉਨ੍ਹਾਂ ਦਾ ਲਗਾਤਾਰ ਚੰਗਾ ਪ੍ਰਦਰਸ਼ਨ ਨਾ ਕਰਨਾ ਹੈ। ਇਹੀ ਕਾਰਨ ਹੈ ਕਿ ਜਦੋਂ ਸੂਰਿਆਕੁਮਾਰ ਤੋਂ ਬਾਅਦ ਭਾਰਤ ਦੇ ਨਵੇਂ ਟੀ-20 ਕਪਤਾਨ ਨੂੰ ਲੈ ਕੇ ਬਹਿਸ ਚੱਲ ਰਹੀ ਸੀ, ਤਾਂ ਸੰਜੂ ਇਸੇ ਵਜ੍ਹਾ ਕਰਕੇ ਪਿਛੜ ਗਏ ਸਨ। ਸਿਲੈਕਟਰਾਂ ਦਾ ਮੰਨਣਾ ਸੀ ਕਿ ਉਹ ਨਿਰੰਤਰ ਨਹੀਂ ਹਨ ਅਤੇ ਇਸ ਲਈ ਕਪਤਾਨੀ ਨਹੀਂ ਦਿੱਤੀ ਜਾ ਸਕਦੀ। ਕਈ ਮੀਡੀਆ ਰਿਪੋਰਟਾਂ ‘ਚ ਇਹ ਦਾਅਵਾ ਕੀਤਾ ਗਿਆ ਸੀ। ਇਸੇ ਕਾਰਨ ਹੁਣ ਲੱਗਦਾ ਨਹੀਂ ਹੈ ਕਿ ਸੰਜੂ ਦੀ ਟੀਮ ‘ਚ ਵਾਪਸੀ ਹੋ ਸਕੇਗੀ। ਵੈਸੇ ਵੀ ਓਪਨਿੰਗ ਲਈ ਭਾਰਤ ਕੋਲ ਕਈ ਵਿਕਲਪ ਹਨ। ਅਭਿਸ਼ੇਕ ਅਤੇ ਵੈਭਵ ਟੀਮ ‘ਚ ਹਨ। ਯਸ਼ਸਵੀ ਜਾਇਸਵਾਲ, ਸ਼ੁਭਮਨ ਗਿੱਲ ਵਰਗੇ ਖਿਡਾਰੀ ਬਾਹਰ ਬੈਠੇ ਹਨ। ਅਜਿਹੇ ‘ਚ ਸਿਲੈਕਟਰ ਉਨ੍ਹਾਂ ਖਿਡਾਰੀਆਂ ਨੂੰ ਮੌਕਾ ਦੇਣਾ ਚਾਹੁਣਗੇ ਜੋ ਨਿਰੰਤਰ ਹੋਣ। ਹਾਲਾਂਕਿ, ਇਹ ਕ੍ਰਿਕਟ ਹੈ ਅਤੇ ਇਸ ਗੱਲ ਤੋਂ ਵੀ ਸਾਫ਼ ਇਨਕਾਰ ਨਹੀਂ ਕੀਤਾ ਜਾ ਸਕਦਾ ਕਿ ਸੰਜੂ ਵਾਪਸੀ ਕਰ ਲੈਣ।