ਦੇਸ਼ ਦੀ ਸਭ ਤੋਂ ਵੱਡੀ ਨੀਮ-ਫੌਜੀ ਫੋਰਸ ਸੀਆਰਪੀਐੱਫ ਵਿੱਚ 250 ਤੋਂ ਵੱਧ ਅਧਿਕਾਰੀਆਂ ਨੂੰ ਲੰਬੀ ਉਡੀਕ ਮਗਰੋਂ ਆਖ਼ਰਕਾਰ ਤਰੱਕੀ ਮਿਲ ਗਈ ਹੈ। 14 ਤੋਂ 15 ਸਾਲਾਂ ਤੋਂ ਪੈਂਡਿੰਗ ਪਈ ਇਹ ਤਰੱਕੀ ਹੁਣ ਸੇਵਾ ਸਬੰਧੀ ਮੁੱਦਿਆਂ ਦੇ ਨਿਪਟਾਰੇ ਅਤੇ ਸੀਨਿਓਰਿਟੀ ਸਪਸ਼ਟੀਕਰਨ ਤੋਂ ਬਾਅਦ ਸੰਭਵ ਹੋ ਸਕੀ ਹੈ। ਜਾਣਕਾਰੀ ਅਨੁਸਾਰ 26 ਜੂਨ ਨੂੰ ਸੀਆਰਪੀਐੱਫ ਹੈੱਡਕੁਆਰਟਰ ਵੱਲੋਂ 263 ਸਹਾਇਕ ਕਮਾਂਡੈਂਟ (ਏਸੀ) ਰੈਂਕ ਦੇ ਅਧਿਕਾਰੀਆਂ ਨੂੰ ਉਪ ਕਮਾਂਡੈਂਟ (ਡੀਸੀ) ਦੇ ਅਹੁਦੇ ‘ਤੇ ਤਰੱਕੀ ਦੇ ਹੁਕਮ ਜਾਰੀ ਕੀਤੇ ਗਏ ਹਨ। ਸਹਾਇਕ ਕਮਾਂਡੈਂਟ ਅਰਧਸੈਨਿਕ ਬਲਾਂ ਵਿੱਚ ਐਂਟਰੀ-ਲੈਵਲ ਅਫ਼ਸਰ ਪੱਧਰ ਦਾ ਅਹੁਦਾ ਮੰਨਿਆ ਜਾਂਦਾ ਹੈ।


ਸੀਆਰਪੀਐੱਫ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਇਹ ਤਰੱਕੀ ਅਧਿਕਾਰੀਆਂ ਲਈ ਵੱਡੀ ਰਾਹਤ ਅਤੇ ਮਨੋਬਲ ਵਧਾਉਣ ਵਾਲਾ ਕਦਮ ਹੈ, ਕਿਉਂਕਿ ਉਨ੍ਹਾਂ ਨੂੰ ਆਪਣੀ ਪਹਿਲੀ ਤਰੱਕੀ ਲਈ 14 ਤੋਂ 15 ਸਾਲ ਤੱਕ ਇੰਤਜ਼ਾਰ ਕਰਨਾ ਪਿਆ, ਜਦਕਿ ਆਮ ਤੌਰ ‘ਤੇ ਇਹ ਪ੍ਰਕਿਰਿਆ ਲਗਭਗ 5 ਸਾਲਾਂ ਵਿੱਚ ਪੂਰੀ ਹੋਣੀ ਚਾਹੀਦੀ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਦੇਰੀ ਮੁੱਖ ਤੌਰ ‘ਤੇ ਸੀਨਿਓਰਿਟੀ ਵਿਵਾਦਾਂ ਅਤੇ ਖਾਲੀ ਅਸਾਮੀਆਂ ਨਾਲ ਜੁੜੇ ਸੇਵਾ ਸੰਬੰਧੀ ਮਸਲਿਆਂ ਕਾਰਨ ਹੋਈ ਸੀ। ਹਾਲ ਹੀ ਵਿੱਚ 16 ਅਪ੍ਰੈਲ ਨੂੰ ਸੁਪਰੀਮ ਕੋਰਟ ਵੱਲੋਂ ਦਿੱਤੇ ਗਏ ਹੁਕਮਾਂ ਨੇ ਇਸ ਮਾਮਲੇ ਵਿੱਚ ਸਪਸ਼ਟਤਾ ਲਿਆਉਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ। ਤਰੱਕੀ ਮਿਲਣ ਮਗਰੋਂ ਲੰਬੇ ਸਮੇਂ ਤੋਂ ਉਡੀਕ ਕਰ ਰਹੇ ਅਧਿਕਾਰੀਆਂ ਵਿੱਚ ਖੁਸ਼ੀ ਅਤੇ ਰਾਹਤ ਦਾ ਮਾਹੌਲ ਹੈ ਅਤੇ ਇਸ ਨੂੰ ਫੋਰਸ ਦੇ ਅੰਦਰ ਇਕ ਮਹੱਤਵਪੂਰਨ ਪ੍ਰਸ਼ਾਸਕੀ ਸੁਧਾਰ ਵਜੋਂ ਦੇਖਿਆ ਜਾ ਰਿਹਾ ਹੈ।