June 10, 2026
Punjab Speaks Team / Punjab
ਨਵੀਂ ਦਿੱਲੀ 10 ਜੂਨ 2026: ਐਸੋਸੀਏਸ਼ਨ ਆਫ਼ ਮਿਊਚਲ ਫੰਡਸ ਇਨ ਇੰਡੀਆ (AMFI) ਦੇ ਮਈ 2026 ਦੇ ਤਾਜ਼ਾ ਅੰਕੜਿਆਂ ਵਿੱਚ ਇੱਕ ਵੱਡਾ ਟ੍ਰੈਂਡ ਸਾਹਮਣੇ ਆਇਆ ਹੈ। ਸੋਨੇ ਵਿੱਚ ਲਗਾਤਾਰ ਉਤਾਰ-ਚੜ੍ਹਾਅ ਤੋਂ ਬਾਅਦ ਹੁਣ ਨਿਵੇਸ਼ਕਾਂ ਨੇ ਗੋਲਡ ਐਕਸਚੇਂਜ ਟਰੇਡਿਡ ਫੰਡ ਵਿੱਚੋਂ ਪੈਸੇ ਕੱਢਣੇ ਸ਼ੁਰੂ ਕਰ ਦਿੱਤੇ ਹਨ। ਅੰਕੜਿਆਂ ਮੁਤਾਬਕ ਮਈ ਮਹੀਨੇ ਵਿੱਚ ਗੋਲਡ ਈ.ਟੀ.ਐਫ. ਵਿੱਚੋਂ 700 ਕਰੋੜ ਰੁਪਏ ਤੋਂ ਵੱਧ ਦੀ ਸ਼ੁੱਧ ਨਿਕਾਸੀ ਦਰਜ ਕੀਤੀ ਗਈ, ਜੋ ਪਿਛਲੇ ਕਈ ਮਹੀਨਿਆਂ ਦੇ ਟ੍ਰੈਂਡ ਦੇ ਬਿਲਕੁਲ ਉਲਟ ਹੈ।
ਦਰਅਸਲ, ਸਾਲ 2026 ਦੀ ਸ਼ੁਰੂਆਤ ਵਿੱਚ ਗੋਲਡ ਈ.ਟੀ.ਐਫ. ਵਿੱਚ ਜ਼ਬਰਦਸਤ ਨਿਵੇਸ਼ ਦੇਖਿਆ ਗਿਆ ਸੀ। ਜਨਵਰੀ ਵਿੱਚ ਤਾਂ ਸਥਿਤੀ ਇਹ ਸੀ ਕਿ ਗੋਲਡ ਈ.ਟੀ.ਐਫ. ਦੇ ਨਿਵੇਸ਼ ਨੇ ਇਕੁਇਟੀ ਫੰਡਾਂ ਨੂੰ ਵੀ ਪਿੱਛੇ ਛੱਡ ਦਿੱਤਾ ਸੀ ਕਿਉਂਕਿ ਗਲੋਬਲ ਅਨਿਸ਼ਚਿਤਤਾ ਅਤੇ ਵਧਦੀਆਂ ਕੀਮਤਾਂ ਦੇ ਵਿਚਕਾਰ ਨਿਵੇਸ਼ਕਾਂ ਨੇ ਸੋਨੇ ਨੂੰ ਇੱਕ ਸੁਰੱਖਿਅਤ ਬਦਲ ਮੰਨਿਆ ਪਰ ਮਈ ਆਉਂਦੇ-ਆਉਂਦੇ ਤਸਵੀਰ ਬਦਲ ਗਈ। ਅੰਤਰਰਾਸ਼ਟਰੀ ਪੱਧਰ ‘ਤੇ ਸੋਨੇ ਦੀਆਂ ਕੀਮਤਾਂ ਵਿੱਚ ਤੇਜ਼ ਉਛਾਲ ਅਤੇ ਘਰੇਲੂ ਬਾਜ਼ਾਰ ਵਿੱਚ ਰਿਕਾਰਡ ਪੱਧਰ ‘ਤੇ ਪਹੁੰਚਣ ਤੋਂ ਬਾਅਦ ਨਿਵੇਸ਼ਕਾਂ ਨੇ ਮੁਨਾਫ਼ਾਖੋਰੀ ਸ਼ੁਰੂ ਕਰ ਦਿੱਤੀ। ਇਹੀ ਕਾਰਨ ਹੈ ਕਿ ਗੋਲਡ ਈ.ਟੀ.ਐਫ. ਵਿੱਚੋਂ ਵੱਡੀ ਨਿਕਾਸੀ ਦੇਖਣ ਨੂੰ ਮਿਲੀ।
ਰਿਪੋਰਟਾਂਅਨੁਸਾਰ, ਮਈ 2026 ਵਿੱਚ ਭਾਰਤ ਦੇ ਗੋਲਡ ਈ.ਟੀ.ਐਫ. ਵਿੱਚੋਂ ਕਰੀਬ 61 ਮਿਲੀਅਨ ਡਾਲਰ ਦੀ ਨਿਕਾਸੀ ਹੋਈ। ਇਹ ਪਿਛਲੇ ਇੱਕ ਸਾਲ ਵਿੱਚ ਪਹਿਲੀ ਵਾਰ ਹੈ ਜਦੋਂ ਗੋਲਡ ਈ.ਟੀ.ਐਫ. ਵਿੱਚੋਂ ਸ਼ੁੱਧ ਆਊਟਫਲੋ ਦਰਜ ਕੀਤਾ ਗਿਆ ਹੈ।
ਕਿਉਂ ਬਦਲਿਆ ਨਿਵੇਸ਼ਕਾਂ ਦਾ ਮੂਡ
ਮਾਹਿਰਾਂ ਦੇ ਮੁਤਾਬਕ ਇਸ ਦੇ ਪਿੱਛੇ ਕਈ ਮੁੱਖ ਕਾਰਨ ਹਨ।
ਸੋਨੇ ਦੀਆਂ ਕੀਮਤਾਂ ਦਾ ਰਿਕਾਰਡ ਪੱਧਰ ‘ਤੇ ਪਹੁੰਚਣਾ, ਜਿਸ ਕਾਰਨ ਨਿਵੇਸ਼ਕਾਂ ਨੇ ਮੁਨਾਫ਼ਾ ਬੁੱਕ ਕੀਤਾ।
ਸਰਕਾਰ ਨੇ ਇੰਪੋਰਟ ਡਿਊਟੀ (ਆਯਾਤ ਟੈਕਸ) 6% ਤੋਂ ਵਧਾ ਕੇ 15% ਕਰ ਦਿੱਤੀ, ਜਿਸ ਨਾਲ ਘਰੇਲੂ ਕੀਮਤਾਂ ਹੋਰ ਵਧ ਗਈਆਂ।
ਬਾਜ਼ਾਰ ਵਿੱਚ ਅਸਥਿਰਤਾ, ਜਿਸ ਦੇ ਚਲਦਿਆਂ ਨਿਵੇਸ਼ਕਾਂ ਨੇ ਆਪਣੇ ਪੋਰਟਫੋਲੀਓ ਨੂੰ ਰੀਬੈਲੇਂਸ (ਦੁਬਾਰਾ ਸੰਤੁਲਿਤ) ਕੀਤਾ।
AMFI ਦਾ ਡੇਟਾ ਕੀ ਕਹਿੰਦਾ ਹੈ
AMFI ਦੇ ਮਹੀਨਾਵਾਰ ਅੰਕੜਿਆਂ ਮੁਤਾਬਕ, ਜਨਵਰੀ 2026 ਵਿੱਚ ਗੋਲਡ ਈ.ਟੀ.ਐਫ. ਵਿੱਚ ਰਿਕਾਰਡ ਨਿਵੇਸ਼ ਆਇਆ ਸੀ। ਪਰ ਮਾਰਚ ਤੱਕ ਨਿਵੇਸ਼ ਘਟਣ ਲੱਗਾ ਅਤੇ ਮਈ ਵਿੱਚ ਪਹਿਲੀ ਵਾਰ ਨੈੱਟ ਆਊਟਫਲੋ ਦਰਜ ਹੋਇਆ। ਯਾਨੀ ਸਾਲ ਦੀ ਸ਼ੁਰੂਆਤ ਵਿੱਚ ਤੇਜ਼ੀ ਨਾਲ ਨਿਵੇਸ਼ ਕਰਨ ਵਾਲੇ ਨਿਵੇਸ਼ਕਾਂ ਨੇ ਹੁਣ ਉੱਚੇ ਪੱਧਰ ‘ਤੇ ਪੈਸਾ ਕੱਢਣਾ ਸ਼ੁਰੂ ਕਰ ਦਿੱਤਾ ਹੈ।
ਪਹਿਲਾਂ ਕਿਉਂ ਹੋਇਆ ਸੀ ਗੋਲਡ ਈ.ਟੀ.ਐਫ. ‘ਚ ਜ਼ੋਰਦਾਰ ਨਿਵੇਸ਼
ਵਿੱਤੀ ਸਾਲ 2026 (FY26) ਵਿੱਚ ਗੋਲਡ ਈ.ਟੀ.ਐਫ. ਵਿੱਚ ਨਿਵੇਸ਼ ਨੇ ਰਿਕਾਰਡ ਬਣਾਇਆ ਸੀ। ਪੂਰੇ ਵਿੱਤੀ ਸਾਲ ਵਿੱਚ ਇਸ ਕੈਟੇਗਰੀ ਵਿੱਚ 68,000 ਕਰੋੜ ਰੁਪਏ ਤੋਂ ਵੱਧ ਦਾ ਨਿਵੇਸ਼ ਆਇਆ, ਜੋ ਪਿਛਲੇ ਸਾਲਾਂ ਦੇ ਮੁਕਾਬਲੇ ਕਈ ਗੁਣਾ ਜ਼ਿਆਦਾ ਸੀ। ਇਸ ਤੋਂ ਸਾਫ਼ ਹੈ ਕਿ ਨਿਵੇਸ਼ਕ ਸੋਨੇ ਨੂੰ ਲੰਬੇ ਸਮੇਂ ਲਈ ਇੱਕ ਸੁਰੱਖਿਅਤ ਨਿਵੇਸ਼ ਮੰਨਦੇ ਹਨ ਪਰ ਸ਼ਾਰਟ ਟਰਮ ਵਿੱਚ ਕੀਮਤ ਵਧਣ ‘ਤੇ ਮੁਨਾਫ਼ਾ ਵੀ ਕੱਢਦੇ ਹਨ।
ਅੱਗੇ ਕੀ ਸੰਕੇਤ ਹਨ
ਮਈ ਦਾ ਡੇਟਾ ਇਹ ਦਿਖਾਉਂਦਾ ਹੈ ਕਿ ਨਿਵੇਸ਼ਕ ਹੁਣ ਸਤਰਕ ਹੋ ਗਏ ਹਨ ਅਤੇ ਹਾਈ ਪ੍ਰਾਈਸ ‘ਤੇ ਐਂਟਰੀ ਲੈਣ ਤੋਂ ਬਚ ਰਹੇ ਹਨ। ਹਾਲਾਂਕਿ, ਸਾਲ ਦੀ ਸ਼ੁਰੂਆਤ ਵਿੱਚ ਆਏ ਭਾਰੀ ਨਿਵੇਸ਼ ਨੂੰ ਦੇਖਦੇ ਹੋਏ ਇਹ ਗਿਰਾਵਟ ਇੱਕ ਅਸਥਾਈ ਟ੍ਰੈਂਡ ਵੀ ਹੋ ਸਕਦੀ ਹੈ। ਮਾਹਿਰ ਮੰਨਦੇ ਹਨ ਕਿ ਜੇਕਰ ਗਲੋਬਲ ਅਨਿਸ਼ਚਿਤਤਾ ਬਣੀ ਰਹਿੰਦੀ ਹੈ ਜਾਂ ਬਾਜ਼ਾਰ ਵਿੱਚ ਉਤਾਰ-ਚੜ੍ਹਾਅ ਵਧਦਾ ਹੈ ਤਾਂ ਆਉਣ ਵਾਲੇ ਮਹੀਨਿਆਂ ਵਿੱਚ ਗੋਲਡ ਈ.ਟੀ.ਐਫ. ਵਿੱਚ ਫਿਰ ਤੋਂ ਨਿਵੇਸ਼ ਵਧ ਸਕਦਾ ਹੈ।
Gold ETF Withdrawals Of Over Rs 700 Crore In May Profiteering And High Prices Changed The Attitude Of Investors
