ਸ੍ਰੀ ਅਨੰਦਪੁਰ ਸਾਹਿਬ 01 ਦਸੰਬਰ: ਪੰਚਾਇਤ ਸੰਮਤੀ ਅਤੇ ਜ਼ਿਲ੍ਹਾ ਪ੍ਰੀਸ਼ਦ ਚੋਣਾਂ 2025 ਸਬੰਧੀ ਸਾਰੇ ਮਹੱਤਵਪੂਰਨ ਪੜਾਅ ਦੀਆਂ ਤਾਰੀਖਾਂ ਅਤੇ ਦਿਸ਼ਾ-ਨਿਰਦੇਸ਼ ਅਧਿਕਾਰਕ ਤੌਰ ‘ਤੇ ਜਾਰੀ ਕਰ ਦਿੱਤੀਆਂ ਗਈਆਂ ਹਨ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਰਿਟਰਨਿੰਗ ਅਫਸਰ ਜਸਪ੍ਰੀਤ ਸਿੰਘ ਪੀ.ਸੀ.ਐਸ ਉਪ ਮੰਡਲ ਮੈਜਿਸਟ੍ਰੇਟ ਸ੍ਰੀ ਅਨੰਦਪੁਰ ਸਾਹਿਬ ਨੇ ਦੱਸਿਆ ਕਿ ਚੋਣ ਪ੍ਰਕਿਰਿਆ ਪੂਰੀ ਪਾਰਦਰਸ਼ਤਾ ਨਾਲ ਅਤੇ ਨਿਰਧਾਰਤ ਸਮਾਂ-ਸਾਰਣੀ ਮੁਤਾਬਕ ਕਰਵਾਈ ਜਾਵੇਗੀ।
ਉਨ੍ਹਾਂ ਦੱਸਿਆ ਕਿ ਨਾਮਜ਼ਦਗੀਆਂ 1 ਦਸੰਬਰ 2025 ਤੋਂ 4 ਦਸੰਬਰ 2025 ਸਮਾ 3.00 ਵਜੇ ਤੱਕ ਸਵੀਕਾਰ ਕੀਤੀਆਂ ਜਾਣਗੀਆਂ। ਨਾਮਜ਼ਦਗੀਆਂ ਦੀ ਸਕਰੂਟਨੀ 5 ਦਸੰਬਰ ਨੂੰ ਹੋਵੇਗੀ ਅਤੇ ਨਾਮਜ਼ਦਗੀਆਂ ਵਾਪਸ ਲੈਣ ਦੀ ਮਿਤੀ 6 ਦਸੰਬਰ 2025 ਨਿਰਧਾਰਤ ਕੀਤੀ ਗਈ ਹੈ। ਇਸੇ ਦਿਨ ਚੋਣ ਨਿਸ਼ਾਨ ਵੀ ਅਲਾਟ ਕਰ ਦਿੱਤੇ ਜਾਣਗੇ। ਚੋਣ ਪ੍ਰਚਾਰ ਲਈ 7 ਦਸੰਬਰ ਤੋਂ 12 ਦਸੰਬਰ ਸ਼ਾਮ 4 ਵਜੇ ਤੱਕ ਸਮਾਂ ਨਿਰਧਾਰਤ ਹੈ। ਵੋਟਾਂ ਦੀ ਗਿਣਤੀ 17 ਦਸੰਬਰ ਦੀ ਸਵੇਰ 8 ਵਜੇ ਤੋਂ ਸ਼ੁਰੂ ਹੋਵੇਗੀ।
ਰਿਟਰਨਿੰਗ ਅਫਸਰ ਨੇ ਚੋਣ ਖਰਚੇ ਦੀ ਉੱਪਰੀ ਸੀਮਾ ਬਾਰੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਪੰਚਾਇਤ ਸੰਮਤੀ ਲਈ 1,10,000 ਰੁਪਏ ਅਤੇ ਜ਼ਿਲ੍ਹਾ ਪ੍ਰੀਸ਼ਦ ਲਈ 2,55,000 ਰੁਪਏ ਦੀ ਖਰਚਾ ਹੱਦ ਤੈਅ ਕੀਤੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਪੰਚਾਇਤ ਸੰਮਤੀ ਦੇ ਕੁੱਲ 15 ਜੋਨ ਬਣਾਏ ਗਏ ਹਨ ਜਿਨ੍ਹਾਂ ਹੇਠਾਂ 111 ਪੰਚਾਇਤਾਂ ਆਉਂਦੀਆਂ ਹਨ। ਚੋਣਾਂ ਲਈ ਕੁੱਲ 118 ਪੋਲਿੰਗ ਸਟੇਸ਼ਨ ਸਥਾਪਤ ਕੀਤੇ ਗਏ ਹਨ, ਜਿਨ੍ਹਾਂ ਵਿੱਚੋਂ 105 ਸਿੰਗਲ, 5 ਡਬਲ ਅਤੇ 1 ਟ੍ਰਿਪਲ ਪੋਲਿੰਗ ਸਟੇਸ਼ਨ ਹੈ।
ਰਾਖਵੀਆਂ ਸੀਟਾਂ ਬਾਰੇ ਜਾਣਕਾਰੀ ਦਿੰਦਿਆਂ ਉਨ੍ਹਾਂ ਦੱਸਿਆ ਕਿ ਗੰਭੀਰਪੁਰ ਵਿੱਚ ਜਨਰਲ, ਢੇਰ ਪਿੰਡ ਵਿੱਚ ਇਸਤਰੀ, ਗਰਾਂ ਪਿੰਡ ਵਿੱਚ ਬੀ.ਸੀ, ਬਾਸੋਵਾਲ ਪਿੰਡ ਵਿੱਚ ਅ.ਜ. ਇਸਤਰੀ, ਗੰਗੂਵਾਲ, ਮੋਹੀਵਾਲ, ਅਗੰਮਪੁਰ ਅਤੇ ਝਿੰਜੜੀ ਪਿੰਡਾਂ ਵਿੱਚ ਇਸਤਰੀਆਂ ਲਈ ਸੀਟ ਰਾਖਵੀਆਂ ਹਨ। ਕੋਟਲਾ, ਸਮਲਾਹ, ਬੜਾ ਪਿੰਡ ਅਤੇ ਭਰਤਗੜ੍ਹ ਵਿੱਚ ਜਨਰਲ ਸੀਟਾਂ ਹਨ। ਮੱਸੇਵਾਲ ਅਤੇ ਡਾਢੀ ਪਿੰਡ ਵਿੱਚ ਅ.ਜ. ਸ਼੍ਰੇਣੀ ਰਾਖਵੀ ਹੈ, ਜਦਕਿ ਨੰਗਲ ਸਰਸਾ ਵਿੱਚ ਇਸਤਰੀ ਵਰਗ ਲਈ ਸੀਟ ਰਾਖਵੀ ਕੀਤੀ ਗਈ ਹੈ।
ਉਨ੍ਹਾਂ ਕਿਹਾ ਕਿ ਚੋਣ ਪ੍ਰਕਿਰਿਆ ਸੁਚਾਰੂ, ਨਿਰਪੱਖ ਅਤੇ ਸ਼ਾਂਤੀਪੂਰਨ ਬਣਾਉਣ ਲਈ ਸਾਰੇ ਪ੍ਰਬੰਧ ਪੂਰੇ ਕੀਤੇ ਜਾ ਰਹੇ ਹਨ ਅਤੇ ਅਧਿਕਾਰੀਆਂ ਨੂੰ ਸਖ਼ਤ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ ਹਨ ਤਾਂ ਜੋ ਹਰ ਵੋਟਰ ਨੂੰ ਬਿਨਾਂ ਕਿਸੇ ਰੁਕਾਵਟ ਦੇ ਆਪਣਾ ਵੋਟ ਅਧਿਕਾਰ ਵਰਤਣ ਦੀ ਪੂਰੀ ਸਹੂਲਤ ਮਿਲੇ।