ਦਿੱਲੀ ਦੇ ਪਾਲਮ ਖੇਤਰ ਦੇ ਸਾਧਨਗਰ ਵਿੱਚ ਚਾਰ ਮੰਜ਼ਿਲਾ ਮਕਾਨ ਵਿੱਚ ਲੱਗੀ ਭਿਆਨਕ ਅੱਗ ਨੇ 6 ਲੋਕਾਂ ਦੀ ਜਾਨ ਲੈ ਲਈ, ਪਰ ਇਸ ਦੌਰਾਨ ਗੁਆਂਢੀਆਂ ਦੀ ਹਿੰਮਤ ਅਤੇ ਤੁਰੰਤ ਕਾਰਵਾਈ ਨੇ ਕਈ ਹੋਰ ਜਾਨਾਂ ਬਚਾ ਲਈਆਂ।ਬੁੱਧਵਾਰ ਸਵੇਰੇ ਕਰੀਬ 6:40 ਵਜੇ ਅੱਗ ਲੱਗਣ ਦੀ ਜਾਣਕਾਰੀ ਮਿਲੀ, ਜਦੋਂ ਇੱਕ ਨੌਜਵਾਨ ਨੇ ਕਾਲਜ ਜਾਂਦੇ ਸਮੇਂ ਮਕਾਨ ਵਿੱਚੋਂ ਨਿਕਲਦਾ ਧੂੰਆਂ ਦੇਖਿਆ ਅਤੇ ਆਪਣੇ ਪਿਤਾ ਯੋਗੇਸ਼ ਸ਼ਰਮਾ ਨੂੰ ਸੂਚਿਤ ਕੀਤਾ। ਯੋਗੇਸ਼ ਤੁਰੰਤ ਮੌਕੇ 'ਤੇ ਪਹੁੰਚੇ ਅਤੇ ਹਾਲਾਤਾਂ ਨੂੰ ਸਮਝਦਿਆਂ ਘਰ ਵਿੱਚ ਫਸੇ ਲੋਕਾਂ ਨੂੰ ਉੱਚੀ ਆਵਾਜ਼ ਵਿੱਚ ਛੱਤ ਵੱਲ ਜਾਣ ਲਈ ਕਿਹਾ।

ਜਦੋਂ ਅੱਗ ਅਤੇ ਧੂੰਆਂ ਬਹੁਤ ਵਧ ਗਿਆ, ਤਾਂ ਯੋਗੇਸ਼ ਅਤੇ ਹੋਰ ਗੁਆਂਢੀ ਆਪਣੀ ਜਾਨ ਦੀ ਪਰਵਾਹ ਕੀਤੇ ਬਿਨਾਂ ਨਾਲ ਲੱਗਦੇ ਮਕਾਨ ਦੀ ਛੱਤ 'ਤੇ ਚੜ੍ਹ ਗਏ। ਉਨ੍ਹਾਂ ਨੇ ਕੰਧ ਤੋੜ ਕੇ ਇੱਕ ਰਾਹ ਬਣਾਇਆ, ਜਿਸ ਰਾਹੀਂ ਕਈ ਲੋਕਾਂ ਨੂੰ ਬਾਹਰ ਕੱਢਿਆ ਗਿਆ। ਇਹ ਬਚਾਅ ਅਭਿਆਨ ਲਗਭਗ ਦੋ ਘੰਟੇ ਚੱਲਿਆ। ਹਾਲਾਤ ਇੰਨੇ ਗੰਭੀਰ ਹੋ ਗਏ ਸਨ ਕਿ ਕੁਝ ਲੋਕਾਂ ਨੂੰ ਜਾਨ ਬਚਾਉਣ ਲਈ ਉੱਚਾਈ ਤੋਂ ਛਾਲਾਂ ਮਾਰਣੀਆਂ ਪਈਆਂ। ਇਸ ਦੌਰਾਨ ਇੱਕ ਸਾਲ ਦਾ ਬੱਚਾ ਦੂਜੀ ਮੰਜ਼ਿਲ ਤੋਂ ਡਿੱਗ ਗਿਆ ਅਤੇ ਕਈ ਹੋਰ ਲੋਕਾਂ ਨੂੰ ਵੀ ਗੰਭੀਰ ਚੋਟਾਂ ਅਤੇ ਫਰੈਕਚਰ ਹੋਏ।

ਮਕਾਨ ਮਾਲਕ ਰਾਜਿੰਦਰ ਕਸ਼ਯਪ ਦੇ ਘਰ ਵਿੱਚ ਲਗਭਗ 15 ਤੋਂ 17 ਮੈਂਬਰ ਰਹਿੰਦੇ ਸਨ। ਬਾਅਦ ਵਿੱਚ ਫਾਇਰ ਬ੍ਰਿਗੇਡ ਮੌਕੇ 'ਤੇ ਪਹੁੰਚੀ ਅਤੇ 7 ਹੋਰ ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢਿਆ। ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਜੇਕਰ ਗੁਆਂਢੀਆਂ ਵੱਲੋਂ ਸਮੇਂ ਸਿਰ ਦਿਖਾਈ ਗਈ ਬਹਾਦਰੀ ਨਾ ਹੁੰਦੀ, ਤਾਂ ਇਹ ਹਾਦਸਾ ਹੋਰ ਵੀ ਵੱਡਾ ਰੂਪ ਲੈ ਸਕਦਾ ਸੀ।