ਨਵੀਂ ਦਿੱਲੀ 30 ਅਪ੍ਰੈਲ 2026 : ਈਰਾਨ ਨੇ ਜੰਗ ਵਿੱਚ ਅਮਰੀਕਾ ਅਤੇ ਇਜ਼ਰਾਈਲ ਦੇ ਖਿਲਾਫ ਇੱਕ ਨਵੇਂ ਹਥਿਆਰ ਦੀ ਵਰਤੋਂ ਕਰਨ ਦੀ ਧਮਕੀ ਦਿੱਤੀ ਹੈ। ਜਾਣਕਾਰੀ ਅਨੁਸਾਰ, ਈਰਾਨੀ ਨੌਸੈਨਾ ਦੇ ਕਮਾਂਡਰ ਰੀਅਰ ਐਡਮਿਰਲ ਸ਼ਾਹਰਾਮ ਈਰਾਨੀ ਨੇ ਇੱਕ ਨਿਊਜ਼ ਚੈਨਲ ਨੂੰ ਦੱਸਿਆ, “ਇਸਲਾਮਿਕ ਗਣਰਾਜ ਬਹੁਤ ਜਲਦ ਦੁਸ਼ਮਣ ਦੀਆਂ ਫੌਜਾਂ ਦਾ ਸਾਹਮਣਾ ਇੱਕ ਅਜਿਹੇ ਹਥਿਆਰ ਨਾਲ ਕਰੇਗਾ, ਜਿਸ ਤੋਂ ਉਹ ਬਹੁਤ ਜ਼ਿਆਦਾ ਡਰਦੇ ਹਨ।”

ਉਨ੍ਹਾਂ ਅੱਗੇ ਕਿਹਾ, “ਉਹ ਹਥਿਆਰ ਉਨ੍ਹਾਂ ਦੇ ਬਿਲਕੁਲ ਕੋਲ ਹੀ ਹੈ ਅਤੇ ਮੈਨੂੰ ਉਮੀਦ ਹੈ ਕਿ ਇਸ ਨਾਲ ਉਨ੍ਹਾਂ ਨੂੰ ਹਾਰਟ ਅਟੈਕ ਨਹੀਂ ਆਵੇਗਾ।” ਉਨ੍ਹਾਂ ਇਹ ਵੀ ਸਪੱਸ਼ਟ ਕੀਤਾ ਕਿ ਇਹ ਇੱਕ ਅਜਿਹਾ ਹਥਿਆਰ ਹੈ ਜਿਸ ਨਾਲ ਹਾਰਟ ਅਟੈਕ ਵੀ ਆ ਸਕਦਾ ਹੈ। ਇਹ ਚਿਤਾਵਨੀ ਉਦੋਂ ਸਾਹਮਣੇ ਆਈ ਹੈ ਜਦੋਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਈਰਾਨ ਦੇ ਉਸ ਪ੍ਰਸਤਾਵ ਨੂੰ ਠੁਕਰਾ ਦਿੱਤਾ।

ਜਿਸ ਵਿੱਚ ਹੋਰਮੁਜ਼ ਜਲਡਮਰੂਮੱਧ ਨੂੰ ਮੁੜ ਖੋਲ੍ਹਣ ਦੇ ਬਦਲੇ ਅਮਰੀਕਾ ਵੱਲੋਂ ਲਾਈ ਗਈ ਨਾਕਾਬੰਦੀ ਹਟਾਉਣ ਦੀ ਗੱਲ ਕਹੀ ਗਈ ਸੀ। ਹਾਲਾਂਕਿ, ਇਹ ਇੱਕ ਅਜਿਹੀ ਯੋਜਨਾ ਸੀ ਜਿਸ ਨਾਲ ਤੇਹਰਾਨ ਦੇ ਪਰਮਾਣੂ ਪ੍ਰੋਗਰਾਮ ‘ਤੇ ਹੋਣ ਵਾਲੀ ਗੱਲਬਾਤ ਵੀ ਟਲ ਜਾਂਦੀ।

ਅਮਰੀਕੀ ਜੰਗੀ ਬੇੜੇ ‘ਅਬਰਾਹਮ ਲਿੰਕਨ’ ‘ਤੇ ਹਮਲੇ ਦਾ ਦਾਅਵਾ

ਉਨ੍ਹਾਂ ਨੇ ਟਰੰਪ ਪ੍ਰਸ਼ਾਸਨ ਦੀ ਉਸ ਰਣਨੀਤੀ ਦਾ ਵੀ ਮਜ਼ਾਕ ਉਡਾਇਆ, ਜਿਸ ਵਿੱਚ ਹੋਰਮੁਜ਼ ਦੇ ਰਸਤੇ ਈਰਾਨੀ ਤੇਲ ਵਪਾਰ ਨੂੰ ਰੋਕ ਕੇ ਆਰਥਿਕ ਦਬਾਅ ਰਾਹੀਂ ਤੇਹਰਾਨ ਨੂੰ ਗੱਲਬਾਤ ਦੀ ਮੇਜ਼ ‘ਤੇ ਲਿਆਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਸੀ।

ਉਨ੍ਹਾਂ ਕਿਹਾ ਕਿ “ਦੁਸ਼ਮਣਾਂ ਨੇ ਇਹ ਗਲਤਫਹਿਮੀ ਪਾਲ ਲਈ ਹੈ ਕਿ ਉਹ ਈਰਾਨ ਤੋਂ ਆਪਣੀ ਮਨਚਾਹੀ ਗੱਲ ਬਹੁਤ ਆਸਾਨੀ ਨਾਲ ਮਨਵਾ ਲੈਣਗੇ, ਜਦਕਿ ਉਨ੍ਹਾਂ ਦੀ ਇਹ ਸੋਚ ਹੁਣ ਇੱਕ ਮਜ਼ਾਕ ਬਣ ਕੇ ਰਹਿ ਗਈ ਹੈ।”

ਈਰਾਨ ਨੇ ਇਹ ਵੀ ਦਾਅਵਾ ਕੀਤਾ ਕਿ ਉਨ੍ਹਾਂ ਦੀਆਂ ਫੌਜਾਂ ਨੇ ਅਮਰੀਕੀ ਜੰਗੀ ਬੇੜੇ ‘ਅਬਰਾਹਮ ਲਿੰਕਨ’ ਦੇ ਖਿਲਾਫ ਘੱਟੋ-ਘੱਟ ਸੱਤ ਮਿਜ਼ਾਈਲ ਹਮਲੇ ਕੀਤੇ ਹਨ। ਉਨ੍ਹਾਂ ਅਨੁਸਾਰ, ਇਨ੍ਹਾਂ ਹਮਲਿਆਂ ਕਾਰਨ ਅਮਰੀਕਾ ਕੁਝ ਸਮੇਂ ਲਈ ਉਸ ਜੰਗੀ ਬੇੜੇ ਤੋਂ ਜਹਾਜ਼ ਉਡਾਉਣ ਜਾਂ ਹਵਾਈ ਮੁਹਿੰਮ ਚਲਾਉਣ ਵਿੱਚ ਅਸਮਰਥ ਹੋ ਗਿਆ ਸੀ।

ਜੰਗ ਵਿੱਚ ਈਰਾਨ ਨੇ 100 ਸਫਲ ਹਮਲਿਆਂ ਦੀ ਕਹੀ ਗੱਲ

ਈਰਾਨੀ ਨੌਸੈਨਾ ਦੇ ਕਮਾਂਡਰ ਨੇ ਕਿਹਾ ਕਿ ਮੱਧ-ਪੂਰਬ ਵਿੱਚ ਸੰਵੇਦਨਸ਼ੀਲ ਅਮਰੀਕੀ ਅਤੇ ਇਜ਼ਰਾਈਲੀ ਟਿਕਾਣਿਆਂ ‘ਤੇ ਜਵਾਬੀ ਕਾਰਵਾਈ ਵਿੱਚ ਘੱਟੋ-ਘੱਟ 100 ਸਫਲ ਹਮਲੇ ਕੀਤੇ ਗਏ ਹਨ। ਕਮਾਂਡਰ ਅਨੁਸਾਰ, ਈਰਾਨ ਨੇ ਅਰਬ ਸਾਗਰ ਵਾਲੇ ਪਾਸੇ ਤੋਂ ਹੋਰਮੁਜ਼ ਜਲਡਮਰੂਮੱਧ ਨੂੰ ਬੰਦ ਕਰ ਦਿੱਤਾ ਹੈ। ਜੇਕਰ ਉਹ ਹੋਰ ਨੇੜੇ ਆਏ, ਤਾਂ ਅਸੀਂ ਬਿਨਾਂ ਕਿਸੇ ਦੇਰੀ ਦੇ ਜਵਾਬੀ ਕਾਰਵਾਈ ਕਰਾਂਗੇ।

ਉਨ੍ਹਾਂ ਅੱਗੇ ਕਿਹਾ ਕਿ ਨਾਕਾਬੰਦੀ ਦੇ ਬਾਵਜੂਦ, ਕੁਝ ਜਹਾਜ਼ ਸਾਡੀਆਂ ਬੰਦਰਗਾਹਾਂ ਤੋਂ ਰਵਾਨਾ ਹੋ ਚੁੱਕੇ ਹਨ ਅਤੇ ਕੁਝ ਆਪਣੀ ਮੰਜ਼ਿਲ ਤੱਕ ਪਹੁੰਚ ਵੀ ਗਏ ਹਨ। ਉਨ੍ਹਾਂ ਨੇ ਅਮਰੀਕੀ ਫੌਜ ਦੀ ਵੀ ਸਖ਼ਤ ਆਲੋਚਨਾ ਕੀਤੀ, ਜਿਸ ਨੂੰ ਉਨ੍ਹਾਂ ਨੇ ਨਾਕਾਬੰਦੀ ਦੇ ਹਿੱਸੇ ਵਜੋਂ ਕੁਝ ਈਰਾਨੀ ਜਹਾਜ਼ਾਂ ‘ਤੇ ਗੈਰ-ਕਾਨੂੰਨੀ ਕਬਜ਼ਾ ਦੱਸਿਆ; ਉਨ੍ਹਾਂ ਨੇ ਇਸ ਨੂੰ ਨਾ ਸਿਰਫ਼ ਸਮੁੰਦਰੀ ਡਾਕਾ, ਸਗੋਂ ‘ਬੰਧਕ ਬਣਾਉਣਾ’ ਵੀ ਕਿਹਾ।

ਅਮਰੀਕਾ ਨੇ ਈਰਾਨ ਦੇ ਪ੍ਰਸਤਾਵ ਨੂੰ ਠੁਕਰਾਇਆ

ਟਰੰਪ ਨੇ ‘ਐਕਸੀਓਸ’ ਨੂੰ ਦੱਸਿਆ ਹੈ ਕਿ ਉਹ ਈਰਾਨ ਦੇ ਉਸ ਪ੍ਰਸਤਾਵ ਨੂੰ ਠੁਕਰਾ ਰਹੇ ਹਨ, ਜਿਸ ਵਿੱਚ ਅਮਰੀਕੀ ਨਾਕਾਬੰਦੀ ਹਟਾਉਣ ਦੇ ਬਦਲੇ ਸਟ੍ਰੇਟ ਆਫ ਹੋਰਮੁਜ਼ ਨੂੰ ਫਿਰ ਤੋਂ ਖੋਲ੍ਹਣ ਦੀ ਗੱਲ ਕਹੀ ਗਈ ਸੀ। ਇਹ ਇੱਕ ਅਜਿਹੀ ਯੋਜਨਾ ਸੀ, ਜਿਸ ਨਾਲ ਈਰਾਨ ਦੇ ਪਰਮਾਣੂ ਪ੍ਰੋਗਰਾਮ ‘ਤੇ ਹੋਣ ਵਾਲੀ ਚਰਚਾ ਟਲ ਜਾਣੀ ਸੀ।

ਇਸ ਹਫ਼ਤੇ ਅਮਰੀਕੀ ਨੇਤਾਵਾਂ ਨਾਲ ਸਾਂਝੇ ਕੀਤੇ ਗਏ ਈਰਾਨ ਦੇ ਇਸ ਪ੍ਰਸਤਾਵ ਵਿੱਚ, ਪਰਮਾਣੂ ਪ੍ਰੋਗਰਾਮ ਨਾਲ ਜੁੜੀਆਂ ਚਰਚਾਵਾਂ ਨੂੰ ਟਾਲਣ ਦੀ ਮੰਗ ਕੀਤੀ ਗਈ ਸੀ। ਅਜਿਹਾ ਕਰਨ ਨਾਲ ਉਹ ਮਤਭੇਦ ਅਣਸੁਲਝੇ ਹੀ ਰਹਿ ਜਾਂਦੇ, ਜਿਨ੍ਹਾਂ ਕਾਰਨ 28 ਫਰਵਰੀ ਨੂੰ ਅਮਰੀਕਾ ਅਤੇ ਇਜ਼ਰਾਈਲ ਵਿਚਕਾਰ ਜੰਗ ਛਿੜ ਗਈ ਸੀ।